RAMÓN SORDO SOTRES | VECINO DE LLANES
El perguapu conceyu de Sayambre (oficialmente llámase Oseja de Sajambre) tien cinco pueblos: Oseya, Pio, Ribota, Soto y Vierdes. Ente 1952 y 1956 el filólogu Ángel Raimundo Fernández González pañó muchas pallabras de la jabla sayambriega y jecio un estudiu d'ella. P'ayudar a ello, Ismael Redondo, un vecín del pueblu de Pio, escribió un testu nel modu parllar del sitiu, al respetive d'árboles que dan fruta, papel que salió nas páxinas 91 a 98 del llibru que sacó Fernández -tituláu 'El habla y la cultura popular de Oseja de Sajambre' (Oviedo, 1959)- y que val muchu porque son pocos los hombres y muyeres de pueblu qu'escribieren como jablaban. Equí vienen dellos párrafos del escritu d'Ismael, cola ortografía orixinal:
«Me pides que te cuente daqué desta tierra, páceme que da qué te dije ya, y asina no atino qué ál te tó decir».
«Muncho miedo tengo que no te guste ni chispa iste trabayo que hoy jago pa tí, pero yo per degustao tó jacer lo que pueda por que te agrade, porque veo que en tratándose desta tierra todas las cosas te llevan jarta muera».
«Vo jablate de los árboles, no d'aquellos que como el rebollo, la jaya, la teya y otros viven en terreno comunal, anque d'ellos, la verdá, sacamos jarto provecho; sino d'estos otros que viven n'a propiedá».
«El nozal, la castañal, el mazanal, la peral, y el ablanal son los de más otelidá».
«Vamos dir poco a poco, amirando las cosas per espacio, y entamando p'el nozal, que é pa nusotros el que más importancia tien».
«Naz pe los praos y matas, pos en tiempo S'amiguel, cuando el mundio paé que se llena de nueces per todos llaos, los páxaros y ratones las comen, y si cain en tierra aparente, nacen y crecen con mucha juercia, y al verano cuando se va a segar l'herva se jallan pe'los praos muchos nozalinos, que cuando son grandotes, se plantan n'otro llao onde no jagan tanto mal».
«Quier el nozal tierra gordo y fresco, cerca de las riegas, pos si el árbol i-se da güen terreno crez muchísimo».
«Los montes de nozales i-llamamos nozaledas, y son muy sonaos los grandes nozales a los que i llamamos 'nozalones'.»
«Y ahora jablemos de las nueces. ¡Qué güena cosa son! ¿No te saben? Yo te digo que han sabete, sinó de verdes, de secas, y sino de turradas del jorno».
«Y ahora que ya las tenemos maduras porque ya entaman las tempranas a primeros d'Otubre, hay que recoyelas. ¿Sabes demir? Pos agarra la vara de demir, y si esguilas bien, vota pal nozal ¡Ten cuidao con los gayos secos!»
«Cuando las castañas están ya bien roxas y cain col'aire como las nueces, hay que demilas; agarrar la vara y jacer lo mesmo que jecimos col nozal. El suelo quedará allariao de castañas y erizos. Tamién tenemos que apañalas: las castañas n'un costal, los erizos n'otro».
«Cosa güena é la madera de castañal. La xente la oteliza pa jacer las casas, echandoi tanto pa armazón, como pa muebles lo más que se pueda. Tamién lo compran los maderistas y lo pagan muncho».
«Las mazanas son muy golosas pa los rapaces, pos siempre andan acalavexando las mazanales. Las mazanas son güena fruta; lo de juera se llama pulgo y lo de dientro, quiero decir que dientro estan las pepitas».
«Tantu o más que el mazanal, la peral gustai a los rapaces por 'mor de' las peras que no por denguna otra cosa, y recibe d'ellos también güenos calavexazos, pos los rapaces siempre tienen el calavexo a mano».
«Ultimamente diremos, p'acabar, daqué del ablanal, árbol iste que tien poca importancia en Sayambre, no porque sea inútil, sino porque hay pocos, bien que sea porque los vecinos no i dan la importancia que tien, la verdá é que tenemos pocos».
Muera quier dicir 'porfía, empeño, intriga o tema', y los calavexos son unos palos (según otru llibru de Sayambre, el 'Vocabulario Sajambriego' [nel orixinal el nombre era 'Vocabulario Sayambriego'] de Olegario Díaz-Caneja y José Díaz y Díaz-Caneja, León, 2001).
Imprimir artículo
']]}
